LA MADONNA DELLA GROTTA
canto popolare
ra tutti sentiti, sentitiChi si raccunta di sta Matri santa.
Nc'era 'nu mercanti assai potenti
Chi pe lu mari navigando jia,
E 'na gran timpesta s'è levata
Chi n'autru pocu la navi a fundu jia,
E lu mercanti chinu di gran fidi
Fici vutu a la Vergini santa
In persuna mu la faci, gioja mia.
Subitamènti si nd'àvi partitu
Pe'arrivari lu mastru scurturi.
Cu grandi divuzioni lu pregau
Pemmu nci faci sta Matri divina.
Appena chi la ndavi cuminciata
Di na malatia iju fu aggravatu;
E lu mercanti nci ndavi partitu
Pe fari 'na bona navi nova.
Appena chi la ndavi terminata
Cu gran cuntentu a lu mastru jia.
Oh Diu, quandu ntìsi ch'è malatu
Di la pena e duluri si struggia.
«Jiamu, ndi jiamu», illu dicia,
« Armenu mu la viju 'ncuminciata ».
Quandu si avvicinaru a la putiga
Fatta si trovau 'na Majestati.
Lu mastru a lu mercanti sbiguttiti:
« Ohi cosa diti vui di sta gran Matri ?
« Non èni opara mia si la criditi ;
« Criju ch'è fatta di l' Eternu Patri,
« È la vostra, pigliativilla e jti
«Pe lu locu a duvi è distinata».
Cu giubilu e cuntentu si la piglia
E si la 'mbarca su la navi nova.
Appena sulla navi la salisci,
Comu n'accellu a volu illa fujia.
E quandu vinni vicinu ad Arduri
Ferma la navi e più non caminava.
Tutti li marinari su 'n fatiga
Pe varari sta navi e non varava.
Arduri e Cundajanni cu scrittura
Cu dinaru scindiru e no la prezzavanu.
Ora viditi, sta Matri divina.
Supra 'nu carru la misaru sta rigina.
Ddui jenchi servaggi a lu carru attaccaru,
E illa cu chisti lu voscu passava.
Alla Gruttella arrivata la Gran Signura,
Lu carru ferma e chiù non caminava.
Tutti li campagnoli su stupiti
Guardandu e riguardandu sta Gran Matri,
Tutti li genti ccà furu uniti
Pe visitari sta potenti Matri,
Lasciaru li fatighi e su partiti
La chiesa e l'artaru cuminciaru.
D'acqua nc'era gran necessitati,
Non potianu suffriri più la siti.
Maria pensa meraculu mu faci ;
L'acqua cumparì 'nta 'na nuda rupi.
O vui divoti chi a ssu locu jiti
Serviti di cori ssa gran Matri santa
, D'oru e d'argentu li lampi teniti,
L'ogliu e la cira vui no la pensati.
O gran Vergini e grandi Majestati,
Gioja der Paradisu vui cca siti
Madonna di la Grutta vi chiamati,
Avvocata di Bombili ca vui siti,
Nui vi pregamu mu ndi difenditi
E 'n Paradisu pemma ndi levati.