| Comments: |
Vorrei segnalare un sito sull'emigrazione ed una pregevole poesia di Ignazio Buttitta intitolata "Lu Trenu di lu suli".
Turi Scordu, surfararu,
abitanti a Mazarinu;
cu lu Trenu di lu suli
s'avvintura a lu distino.
Chi faceva a Mazzarinu
si travagghiu nun ci nn'era?
fici sciopiru na vota
e lu misiru ngalera.
Una tana la so casa,
quattru ossa la muggheri;
e la fami lu circava
cu li carti di l'usceri.
Sette figgi e la muggheri,
ottu vucchi ed ottu panzi,
e lu cori un camiuni
caricatu di dugghianzi.
Nni lu Belgiu, nveci, ora
travagghiava jornu e notti;
a la mogghi ci scriveva:
nun manciati favi cotti.
Cu li sordi chi ricivi
compra roba e li linzola,
e li scarpi pi li figghi
pi putiri jri a scola.
Li mineri di lu Belgiu,
li mineri di carbuni:
sunnu niri niri niri
comu sangu di draguni.
Turi Scordu, un pezzu d'omu,
a la sira dormi sulu;
ntra lu lettu a pedi fora
smaniava comu un mulu.
Cu li fimmani ntintava;
ma essennu analfabeta,
nun aveva pi ncantarli
li paroli di pueta.
E faceva penitenza
Turi Scordu nni lu Belgiu:
senza tonaca e né mitra
ci pareva un sacrilegiu.
Certi voti lu pinseri
lu purtava ntra la tana,
e lu cori ci sunava
a martoriu la campana.
Ca si c'era la minestra
di patati e di fasoli,
nni dda tana c'era festa
pi la mogghi e li figghioli.
Comu arvulu scippatu
senza radichi e né fogghi,
si sinteva Turi Scordu
quannu penza figgi e mogghi.
Doppu un annu di patiri
finalmente si dicisi:
'Mogghi mia, pigghia la roba,
venitinni a stu paisi'.
E parteru matri e figghi,
salutaru Mazzarinu;
li parenti pi d'appressu
ci facevano fistinu.
Na valigia di cartuni
cu la corda pi traversu;
nni lu pettu lu nutricu
chi sucava a tempu persu.
Pi davanti la cuvata
di li zingari camina:
trusci e sacchi nni li manu,
muntarozzi nni la schina.
La cuvata cu la ciocca
quannu fu supra lu trenu,
nun sapeva s'era ncelu...
si tuccava lu tirrenu.
Lu paisi di luntanu
ora acchiana e ora scinni;
e lu trenu ca vulava
senza ali e senza pinni.
Ogni tantu si firmava
pi infurnari passeggeri:
emigranti surfatara,
figgi, patri e li muggheri.
Patri e matri si prisentanu,
li fa amici la svintura:
l'emigranti na famigghia
fannu dintra la vittura.
'Lu me nomu? Rosa Scordu'
'Lu paisi ?Mazzarinu'
'Unni jiti?'. 'Unni jiamu?
Unni voli lu distino!'.
Quantu cosi si cuntaru!
ca li poveri, si sapi,
hanno guai a miliuna:
muzzicati da li lapi!
Quannu vinni la nuttata
doppu Villa San Giuvanni
una radiu tascabili
addiverti nichi e granni.
Tutti sentinu la radiu,
l'havi nmanu n'emigranti;
li carusi un hannu sonnu,
fannu l'occhi granni tanti.
Rosa Scordu ascuta e pensa,
cu lu sapi chi va a trova.
n'àtra genti e nazioni,
una storia tutta nova.
E si strinci pi difisa
lu nutricu nsunnacchiatu
mentri l'occhi teni ncoddu
di li figghi a lu so latu.
E la radiu tascabili
sona musica di ballu;
un discursu di ministru;
un minutu d'intervallu.
Poi detti li nutizii,
era quasi mezzanotti:
sunnu l'ultimi nutizii
li nutizii di la notti.
LA RADIO TRASMETTE:
Ultime notizie della notte.
una grave sciagura si è verificata
in Belgio nel distretto minerario
di Charleroi.
Per cause non ancora note
una esplosione ha sconvolto
uno dei livelli della
miniera di Marcinelle.
Il numero delle vittime è assai elevato
Ci fu un lampu di spaventu
chi siccò lu ciatu a tutti;
Rosa Scordu sbarra l'occhi,
focu e lacrimi s'agghiutti.
LA RADIO CONTINUA A TRASMETTERE:
I primi cadaveri riportati
alla superficie dalle squadre di soccorso
appartengono a nostri
connazionali emigrati
dalla Sicilia.
Ecco il primo elenco delle vittime.
Natale Fatta, di Riesi provincia di Caltanissetta
Francesco Tilotta, di Villarosa provincia di Enna
Alfio Calabrò, di Agrigento
Salvatore Scordu.
Un trimotu: 'Me maritu!
me maritu!' grida e chianci,
e li vuci sangu e focu
dintra l'occhi comu lanci.
Cu na manu e centu vucchi,
addumata comu torcia,
si lamenta e l'ugna affanna
ntra le carni e si li scorcia.
L'àutra manu strinci e ammacca
lu nutricu stramurtutu,
ca si torci mentri chianci
affucatu e senza aiutu.
E li figghi? Cu capisci,
cu capisci e cu un capisci,
annigati nmenzu e l'unni
di ddu mari senza pisci.
Rosa Scordu, sventurata,
nun è fimmina e né matri,
e li figghi sunnu orfani
di la matri e di lu patri.
Misi attornu l'emigranti
ca nun sannu zoccu fari;
sunnu puru nmenzu a l'unni:
strascinati di ddu mari.
Va lu trenu nni la notti,
chi nuttata longa e scura:
non ci fu lu funerali
è na fossa la vittura.
Turi Scordu a la finestra,
a lu vitru mpiccitatu,
senza occhi, senza vucca:
è un schelitru abbruciatu.
L'arba vinni senza lustru,
Turi Scordu ddà ristava:
Rosa Scordu lu strinceva
nelle braccia, e si bruciava. |
Cittanovesi su facebook
Il canale di CittanovaOnLine su YouTube